Þór/KA og Völsungur í samstarf

Úr leik Völsungs og Þórs/KA í Kjarnafæðismótinu 2022. Ólína Helga Sigþórsdóttir sækir að marki Völsungs. Árdís Rún Þráinsdóttir fyrirliði og Ísabella Júlía Óskarsdóttir verjast.

Þór/KA og Völsungur hafa átt í óformlegu samstarfi í vetur, en nú er komið að því að staðfesta það og halda áfram, taka það á næsta stig.

Eins og frá hefur verið sagt hér hafa ungir leikmenn úr okkar röðum skipt í Völsung í vetur og spilað með liðinu í Lengjubikarnum og ekki bara það heldur vann Völsungur C-deild Lengjubikarsins þegar stelpurnar sigruðu Fjölni í vítaskpyrnukeppni eftir 1-1 jafntefli í úrslitaleiknum. Þetta samstarf í vetur var gert í tilraunaskyni þar sem meistaraflokkur Völsungs var heldur fáliðaður og þurfti liðsstyrk til að tefla fram öflugu liði í Lengjubikarnum. Þegar upp var staðið höfðu sjö leikmenn frá Þór/KA skipt yfir í Völsung á tímabilinu frá marsbyrjun fram í apríllok. Þetta eru þær Anna Guðný Sveinsdóttir, Arna Rut Orradóttir, Helga Dís Hafsteinsdóttir, Ísabella Júlía Óskarsdóttir, Júlía Margrét Sveinsdóttir, Marey Dóróthea Maronsdóttir Olsen og Ólína Helga Sigþórsdóttir. 

Nú hafa þjálfarar og forráðamenn félaganna hist og farið yfir reynsluna, mótað stefnu um framhaldið og verður það innsiglað formlega í dag með heimsókn meistaraflokks og 2. flokks Þórs/KA til Húsavíkur þar sem verður sameiginleg æfing beggja félaganna. 

Frá þessu segir Jóhann Kristinn Gunnarsson í pistli hér á heimasíðunni, en helstu punktar frá Jóhanni um samstarfið eru: 

• Samstarfið snýst um að leikmenn frá okkur í Þór/KA leika með Völsungi í 2. deildinni og styrkja þar með liðið og ná sér í dýrmæta leikreynslu sem bætir þær og styrkir okkar lið í framtíðinni.
• Þjálfurum Völsungs stendur til boða að kynna sér starfið og fylgjast með undirbúningi fyrir leik í Bestu deildinni. Samstarf og samvinna þjálfara félaganna verður virk og gegnum video og samráð verður vel fylgst með okkar leikmönnum sem taka þátt í leikjum Völsungs.
• Okkar leikmenn eru einnig gjaldgengar með U20 hjá Þór/KA í mótum sumarsins.
• Leikmenn Völsungs sem eru í skóla á Akureyri eiga möguleika að æfa með Þór/KA.
• Þegar efnilegir leikmenn Völsungs koma upp og þyrftu að máta sig við hærra getustig er Þór/KA þeirra fyrsta skref.
  
  

„Allur hópurinn tekur þátt í endurheimt og fótboltaæfingu og býður Völsungur í mat á eftir og svo í sjóböðin (Geosea) áður en heim er haldið. Hópurinn sem fer saman í þetta telur um 40 stelpur. Tilvalin leið til að hrista af sér vonbrigði gærdagsins, þétta raðirnar og setja stefnuna á næsta leik!“ skrifar Jóhann í pistli sínum hér á heimasíðunni.

Una Móeiður Hlynsdóttir var á samningi hjá Þór/KA og var lánuð til Völsungs í fyrrasumar og stóð sig frábærlega. Hún er núna í meistaraflokkshópi Þórs/KA, en hefur ekki spilað að undanförnu vegna meiðsla. Mynd: Þórir Tryggva