Kótelettukvöld í Hamri 7. febrúar - skráning stendur yfir

Það er nóg um að vera og fjölbreyttir viðburðir fram undan hjá Þór/KA og leikmönnum meistaraflokks. Happdrætti í deiglunni, kótelettukvöld í Hamri næsta föstudagskvöld, fyrsti leikur í Lengjubikar næsta sunnudag, æfingaferð í mars og Besta deildin byrjar um miðjan apríl.

Meistaraflokkur Þórs/KA undirbýr sig nú fyrir komandi átök, stutt í að Lengjubikarinn hefjist og ekki mikið lengra þar til komið er að fyrsta leik í Bestu deildinni. Liður í undirbúningnum fyrir sumarið er að halda út fyrir landsteinana í vikutíma til æfinga og er förinni heitið á sama stað og í fyrra, æfingavöll við Salobre-golfvöllinn á Gran Canaria. Þar dvaldi hópurinn í byrjun apríl í fyrra og stefnir þangað aftur skömmu fyrir miðjan marsmánuð. Vegna Evrópumótsins og þátttöku Íslands þar verður gert hlé á keppni í Bestu deildinni frá 21. júní og langleiðina út júlímánuð og því hefst keppni í Bestu deildinni um tíu dögum fyrr en í fyrra. 

Liður í undirbúningi æfingaferðarinnar er eins og svo oft áður að leikmenn safna fé með öllum tiltækum ráðum og er kótelettukvöldið liður í því. Ágóði af kvöldinu rennur upp í kostnað við ferðina. Meðal þess sem þar verður í boði eru auðvitað dýrindis kótelettur frá Kjarnafæði-Norðlenska, framreiddar af Einari Gauta, og auðvitað verður Jói Gunn á léttu nótunum og fer yfir stöðu mála og tímabilið fram undan.

Skráningarfrestur á kótelettukvöldið er til hádegis á miðvikudag.

• Skráning hér - https://forms.gle/eUCKjaXNGs7pizCi9
• Einnig má skrá þátttöku með pósti í thorkastelpur@gmail.com, Facebook-skilaboðum á síðu Þórs/KA eða í síma 8242779.

Jafnframt er að hefjast sala á happdrættismiðum með glæsilegum vinningum að verðmæti samtals rúmlega 1,3 milljónir króna. Sala á happdrættismiðunum hefst á allra næstu dögum, en dregið verður 3. mars.

• 9. febrúar: Lengjubikarinn hefst með heimaleik gegn Tindastóli í Boganum sunnudaginn 9. febrúar kl. 17.
• 3. mars: Dregið í happdrætti meistaraflokks
• 16. apríl: Fyrsti leikur liðsins í Bestu deildinni, útileikur gegn Víkingi í Reykjavík.
• 21. apríl: Fyrsti heimaleikurinn í Bestu deildinni, fáum Tindastól í heimsókn á annan í páskum, 21. apríl.

Dagsetningar leikja í Lengjubikarnum: