FRESTAÐ - Kjarnafæðimótið: Þór/KA og FHL mætast í dag

Frestað - Því miður fer þessi leikur ekki fram í dag.

Nú er loksins komið að öðrum leik hjá Þór/KA (liði 1) í Kjarnafæðimótinu, en nú er rúmur mánuður frá fyrsta leiknum. Þór/KA og FHL mætast í Boganum í dag kl. 13.

Það hefur gengið brösuglega að koma á leikjum í kvennadeild Kjarnafæðimótsins og leikir okkar liða gegn Völsungi hafa fallið niður vegna vandkvæða við að manna Völsungsliðið. Þór/KA og Þór/KA2 hafa bæði aðeins spilað einn leik til þessa, en bæði liðin hafa mætt Tindastóli. Þór/KA vann Tindastól 1-0 í desember og Þór/KA2 tapaði 3-4 fyrir þeim á föstudagskvöldið. 

FHL átti að mæta Völsungi á Húsavík í gær en sá leikur féll niður vegna aðstæðna. En nú er loksins komið að öðrum leik hjá Þór/KA þegar stelpurnar mæta nýjasta Bestudeildarliði kvenna, FHL, í Boganum í dag kl. 13.

Gestir á leiknum geta nálgast Þór/KA dagatalið fyrir 2025 í Boganum - sem og keypt harðfisk til styrktar stelpunum vegna æfingaferðar í mars. Harðfiskurinn er til á staðnum og fæst afhentur strax, en leikmenn eru einnig að taka niður pantanir á kleinum frá Axelsbakaríi sem afhentar verða 1. febrúar.