Karen María með þrjár stoðsendingar í sigri á Tindastóli

Karen María Sigurgeirsdóttir í baráttu við leikmenn Tindastóls á Sauðárkróksvelli síðastliðið sumar. Mynd: Egill Bjarni Friðjónsson.

Þór/KA fór upp að hlið Þórs/KA2 á toppi kvennadeildar Kjarnafæðimótsins með 4-0 sigri á Tindastóli í gær. Bæði lið eru með níu stig og mætast í lokaleik deildarinnar.

Þrátt fyrir mörg ágæt tækifæri leit aðeins eitt mark dagsins ljós í fyrri hálfleik. Sandra María Jessen skoraði þá af stuttu færi eftir hornspyrnu frá Karen Maríu Sigurgeirsdóttur.

Annað mark liðsins kom ekki fyrr en eftir tæplega klukkutíma leik, eða á 57. mínútu, og var áþekkt því fyrsta. Agnes Birta Stefánsdóttir skoraði þá af stuttu færi eftir hornspyrnu Karenar Maríu. Margrét Árnadóttir bætti við þriðja markinu tíu mínútum síðar og enn var það Karen María sem átti stoðsendinguna, sína þriðju í þessum leik og þá sjöundu í mótinu. Fjórða markið kom svo undir lokin  þegar Sandra María fór upp vinstri kantinn, sendi boltann fyrir markið, en boltinn fór af varnarmanni Tindastóls í markið.

Tindastóll - Þór/KA 0-4 (0-1)

• 0-1 Sandra María Jessen (14'). Stoðsending: Karen María Sigurgeirsdóttir. 
• 0-2 Agnes Birta Stefánsdóttir (57'). Stoðsending: Karen María Sigurgeirsdóttir. 
• 0-3 Margrét Árnadóttir (67'). Stoðsending: Karen María Sigurgeirsdóttir. 
• 0-4 Sjálfsmark mótherja (81'). Sending: dSandra María Jessen.