Besta deildin: Þór/KA sækir Breiðablik heim í dag

Keppni í Bestu deildinni er hafin að nýju eftir hlé yfir verslunarmannahelgina. Þór/KA á útileik gegn Breiðabliki á Kópavogsvelli í dag kl. 16.

Fyrir leikinn í dag eru liðin í 2. og 3. sæti deildarinnar. Þór/KA er í 3. sætinu með 28 stig, en Breiðablik sæti ofar með 39 stig. Fyrri leikur liðanna í deildinni í sumar fór fram á Akureyri og þar hafði Breiðablik sigur, 3-0.  

Stigin þrjú eru auðvitað báðum liðum mikilvæg í dag, eins og í öllum leikjum. Þór/KA hefur haldið 3. sætinu frá því í byrjun maí og er núna fimm stigum fyrir ofan Víkinga sem eru í 4. sætinu. Breiðablik er fjórum stigum á eftir Val sem er á toppnum og getur því með sigri í dag minnkað bilið í eitt stig. Þegar kemur að tvískiptingu deildarinnar verða það liðin í þremur efstu sætunum sem fá þrjá heimaleiki í lokahluta mótsins, en liðin í 4.-6. sæti fá tvo heimaleiki.

Þór/KA og Breiðablik mættust þrisvar í Bestu deildinni í fyrra og unnust allir leikirnir á heimavelli. Þór/KA vann frábæran 2-0 sigur í Boganum 15. maí þar sem Hulda Ósk Jónsdóttir og Sandra María Jessen sáu um að skora mörkin. Breiðablik vann svo 4-2 sigur á Kópavogsvelli á frídegi verslunarmanna, þar sem Sandra María Jessen og Bríet Jóhannsdóttir skoruðu fyrir okkar lið. Þriðja viðureignin var síðan í efri hluta Bestu deildarinnar og fór fram á VÍS-vellinum (Þórsvelli) 13. september. Þór/KA vann þann leik 3-2 með mörkum frá Karen Maríu Sigurgeirsdóttur, Söndru Maríu Jessen og Unu Móeiði Hlynsdóttur. 

Breiðablik hefur oftar haft betur í viðureignum þessara liða í efstu deild Íslandsmótsins. Þór/KA hefur unnið 13 sinnum, en Breiðablik hefur unnið 22 leiki.

Fjórar í leik dagsins hafa spilað með báðum

Allmargar knattspyrnukonur hafa leikið með báðum félögunum, Þór/KA og Breiðabliki. Þar af eru fjórar sem  gera má ráð fyrir að taki þátt í leiknum í dag. Þrjár þeirra koma upphaflega úr röðum Þórs/KA, Karen María, Jakobína og Heiða Ragney. Eins og áður er þessi listi birtur með fyrirvara, að hluta unninn eftir minni og að hluta út frá beinum félagaskiptum leikmanna milli þessara félaga, en miðast við knattspyrnukonur sem hafa spilað meistaraflokksleiki fyrir bæði félögin.

Nokkuð margar knattspyrnukonur hafa verið hjá báðum félögunum, Þór/KA og Breiðabliki. Þar af eru fjórar sem gera má ráð fyrir að taki þátt í leiknum í dag. 

• Karen María Sigurgeirsdóttir (2001) hóf meistaraflokksferilinn með Þór/KA 2017. Hún skipti yfir í Breiðablik haustið 2021, en sneri aftur norður í mars 2023.
• Heiða Ragney Viðarsdóttir (1995) er uppalin á Akureyri og spilaði fyrir Þór/KA frá 2011 til 2020 að einu ári undanskildu, en hún er núna á sínu fyrsta tímabili með Breiðabliki.
• Jakobína Hjörvarsdóttir (2003) er uppalin á Akureyri og hóf meistaraflokksferilinn með Þór/KA, en skipti í Breiðablik eftir tímabilið 2023.
• Katrín Ásbjörnsdóttir (19929 var hjá Þór/KA 2012-2014 og með Breiðabliki frá 2023 og er enn.
• Vigdís Edda Friðriksdóttir (1999) lék með Breiðabliki 2020 og 2021, og svo Þór/KA hálft tímabilið 2022.
• Tiffany McCarty (1990) var hjá Breiðabliki 2021 og Þór/KA 2022.
• Berglind Baldursdóttir (2000) er uppalin á Akureyri, en var í herbúðum Breiðabliks 2017-2019 og síðan hjá Þór/KA 2020 og hluta úr ári 2021.
• Laufey Harpa Halldórsdóttir (2000), á að baki einn leik með Þór/KA í Lengjubikar 2020, en hún var hjá Breiðabliki 2022.
• Rakel Hönnudóttir (1988) er uppalin á Akureyri og spilaði fyrir Þór/KA 2004-2011, en skipti þá í Breiðablik.
•  
• Inga Birna Friðjónsdóttir (1987) spilaði fyrir Þór/KA/KS 2004 og Breiðablik 2005.
• Laufey Björnsdóttir (1989) er uppalin á Akureyri og spilaði fyrir Þór/KA/KS 2004 og síðan Breiðablik 2005-2007.
• Petra Lind Sigurðardóttir (1988) spilaði fyrir Þór/KA/KS 2003-2005, Þór/KA 2006 og Breiðablik 2007.
• Elsa Hlín Einarsdóttir (1983) spilaði fyrir Þór/KA árið 2000 og Þór/KA/KS 2001, og Breiðabliki 2002-2004 og aftur 2008 og 2009. Sambýlismaður hennar, Jóhann Hreiðarsson, er í þjálfarateymi Þórs/KA.

Eins og áður má eflaust gera ráð fyrir að þessi listi sé ekki tæmandi enda að hluta byggður á minni.